مساجلة شعرية بين الشاعر حمد بن هلال بن خلفان الرحبي والشاعر عرفات بن حريمل الرحبي في بلد المسفاه ولاية بوشر
عرفات :
أبدي وسمي بمن رافع النبي أدريس
فمكان عالي بناه الآلهي وسيسه
صلوا على من خايض صكات لوطيس
ومظهر الدين بسيوف الراجسه
أنثر سلامن لبكيلن ولبتكيس
مقدر أكيله ولا أقدر أكيسه
يغشي شخوص الديره وبن سعيد خميس
أهل لوطن والزايرين فمجلسه
ودقن تهلهل سيله وماطره رسيس
يسقي لجزاير والأروض ليابسه
يدعي عويد النرجس مازر ومييس
يلي يميل بلا هبوبه ونرجسه
جيت بعنيه أزور لكاهن الرييس
من فرحتي بزور أهل الريسه
عسى يتفرح قلبي ويفرح الرميس
لي في هوانا من ليوث الرامس
حمد :
أبدي بمثالي مادام لمجال نفيس
ياهل الطرب يلكم تحيه مكريسه
يامرحبا وحيالله بوصول الرئيس
تفرح بلدنا ولخلايق رامسه
عرفات :
أدعي مسامع راسي للمثل حسيس
يابن هلال مسامعي متحسسه
من لي فضابه قصر لحاكمه بلقيس
من دسسه صواع لملك من دسسه
حمد:
العالم فضابه لقصر ماجابه بدسيس
جابه لخبر من دون حد يآنسه
أما الصواعي يقولو محمله فالكيس
ولقيو لبضاعه فالجواني مكيسه
عرفات :
يابن هلال مبونك للوطن حريس
يلكم علوما شايعه فالبهنسه
ومن اللي زعم ونادى بأحتباس لعيس
لي كان عنده فالبضاعه يحبسه
حمد :
يوسف أمر بحبسه في وقتن غليس
وأمر على نكتل فقصره يجلسه
ويابن حريمل خايف مالبحور تحيس
صعب السفر وسط لبحور لمحيسه
عرفات :
جابه لفسر فضابه فاهم التدريس
يلي مكث حول وشهر فالمدرسه
خيفان أسبح بحرا ولوقت عسعيس
ما سافر البحر وكفوفي مفلسه
حمد :
مقدر أجاوز موجته بحر السويس
يلين ماشوف لغزر وا لمسه
ياقايل لمثايل حالمثل هنديس
أنته فهيم ودارسن فالهندسه
عرفات :
قلبي تفرح من ولى الأمر النحيس
قفن درار السبع يلي منحسه
يالمطربيه شوفو وأنظرو التدويس
يلي مأرخ في سطور الفهرسه
حمد :
من شفكم نعرب كتبات الطريس
وفن الطرب لازم علينا نأسسه
وتلقى الصياغه كل حرفن على تأسيس
نبغاك تمحيهن حروف المنكسه
عرفات :
أختم بمن حرم شراب الخندريس
حتى لحميا وشراب الخندرسه
مبونه شجار لكيذا فالشجر غريس
وا سعد حظه من يلوفه ويغرسه
حمد :
أختم مثالي وأطلب للعذر تلميس
وفي شفكم نقغل حروف مطلمسه
ميجوزلي أسهر الجفن النعيس
ولايجوزلي أسهر عيون الناعسه
تمت المحاوره بقلم الشاعر خليل بن حمد بن هلال بن خلفان الرحبي من بلد المسفاه ولاية بوشر .