على شاطي الأماني نسير لا وقفة ولا رجعة
نقاوم رمله المبلول نحذر زلة الخطوات
وبحره يصفع بموجه بصفعة تعقب الصفعة
وحنا في أمانينا نِحَسْب ان الأمل مافات
حسافة ضاعن أيامٍ عرفنا الذل والدمعة
وضيعنا أمانينا مع الخذلان والدمعات
وشابن روسنا واحنا نقاسي الصمت والفزعة
وأثاري كلها أحلام يعقبها ألم وآهات
عرفنا الدنيا بس مظهر تبين بزينة الطلعة
تخبي في صحايفها معاني الغدر والعلات
وكم من قول يأسرنا واثاري القول بس خدعة
تبعنا من يبايعنا كلامٍ يشبع الرغبات
وجينا الحب غامرنا ونحسب كل ذا متعة
مندري عن بني ادم لهم في حبهم نزوات
بنينا بيوت من حبنا فرشنا أرضها السنعة
وجملنا زواياها بأحلام الأمل والذات
رفعنا بالمنى أنوار ضاءت للهنا لمعة
وقلنا هذا مطلبنا ومأمل طالب الجنات
بعدها صارت اركانه بغمضة عين منصدعة
وخر السقف بالأحقاد زادت منه الونات
عتمنا في الظلام ولا لقينا النور والشمعة
تعثرنا ولاندري نكمل او نكون أموات
قرينا في العشق دستور جمعنا الهوى وشرعه
وشفنا في ضحايا الحب من افلام وحكايات
يـ زين الوقت لو يمضي علينا بلحظة وسرعة
نشوف سنين وايامٍ وكله في العنا ساعات
تضيقنا ولا شفنا بهالدنيا لنا وسعة
ولا خذنا من الحالي ولا الأشواق واللذات
وبن آدم بنياته ميلقى للهنا شبعة
ويزرق ربنا الإنسان ع الأعمال والنيات
ومن يرحل عن الدنيا ويبقى الطاري والسمعة
وكل اللي بقى ذكرى وموقف ينتسي بلحظات
يـ أصحاب الهيام اصحوا قبل ماتحمي الوجعة
ترا الأعمى عن الدنيا يواجه شوك ومطبات
وحب الخل لو يسكن بقلب المبتلي وضلعه
ولا من عقل به حاضر يعاني السقم والعاهات
جنون الحب لو يشفي فراغ القلب أو جزعه
لكان الكل عشاقٍ من النظرات والغمزات
ولكن الحذر واجب من الحيات واللسعة
ترا اللي مايجيد العوم يغرق لو صمد فترات
وكل إنسان يحصدله من اللي ينبت بزرعه
ومن يسعى لحب الخير يلقى الحب والراحات
وكل حاذق بقوله قد يميز ذله و نفعه
ولايجري ورا الأهواء والأطماع والزينات
ويعرف منهو محبوبه ويعرف عونه وربعه
ويعرف وقت مايحسن بظن الناس والغايات
ويمشي في دروب الحب لا زلة ولا وقعة
ويخلص في رضى المحبوب حبٍ في الحشايا بات
وختم القول ياسامع صلاة الله بكل جمعة
على المختار والأصحاب واهل الطهر والطاعات