[فاطمه القمشوعيه]

الاندلس

يا فكري المرهق من العبد والسيد
وأصناف اخرى تنتمي للسذاجه !!
بالجهل عالمنا على راحة الايد
وفنجان أعمى يختصر كل حاجه !!
مجبور اصفق للغبا والتقاليد
في ظل ..ضل الناس عما اواجه ..
من شجرة التطبيل عطني عناقيد
عاجز ااشش الفكر وقت انزعاجه
اللي تشوفه الخلق بدر التجاعيد
بكون اول شخص يكسر رواجه
مسجون لاني انسان ما يازلي قيد !!
والناس حره بس داخل زجا ا ا اجه!!
اتنفس الواقع وازفر تناهيد
ماهو على شاني على شان تاجه:
تاج الصغير اللي سلبنا على كيد
من فريدناند .. وحبنا للديباجه
ومن يومها واحنا نصف الاناشيد
تاريخنا.. اصل التطور نتاجه !
تاريخنا.. كوكب له الكوكب يشيد !
تاريخنا.. هالغرب كمل سياجه !
تاريخنا .. تاريخنا .. نعيد ونزيد ..
كنا ف سجن طول علينا انفراجه !
الاندلس راح ،، المصيبه ف ابا زيد
ما فكر يفكر يشعل سراجه ؟!
يلعن ظلام ف غرفته وخط تحديد
''كل الظلام بسبتك يا خواجه '' !!
لا تثور ع العالم مدامك تبي تفيد
ثور عقلك وشوف كثر احتجاجه
محتج : لانك عايش بدون تجديد
تاكل .. تنام .. ترافق اهل اللجاجه
مسلم مثالي واخر الليل عربيد !!
فالنادي الصحي يكمل مساجه ..
قلنا علاج البخل ف ايد الاجاويد
بس الطموح الشح وش هو علاجه؟!
يطمح ثلاث اشياء ابن الصناديد ..
سيارته .. بيته .. وحفلة زواجه !!
وابن المسيح يفكر ف كيف بيجيد
صنع الجهاز اللي يلبي احتياجه
من يوم صغري عشت ابدع ف ترديد :
العلم نور ومستحيل انبلاجه
وفالاندلس ايقنت وبكل تاكيد
العلم مسكة سيف تنهي التواجه !!
والحين اعذرني انا بترك الصيد
بموت جوع واعتبرها سذاجه
مدام هالعالم على راحة الايد
عجوز شمطاء تختصر كل حاجه !!

مازن الهدابي




اشرعة الوطن العمانية
9\4\2012