[حمود المهزاع النعيمي]

المشاركة الأصلية كتبت بواسطة كاملة البلوشي

السلام عليكم ورحمة الله وبركاته
الشاعر المتألق في سماء الشعر
بصراحه انته شاعر في القمه
واتمنى انا اجاريك في احد قصايدك الجميل

سوالي
اغلب اشعارك من الواقع او من نسج الخيال
يعني بشعرك تقصد احد اغلب الاحيان او مجرد خيال ؟

أهلا كاملة

سيأتي يوم بإذن الله تكونين كشاعرة في القمة ومتألفه في سماء الشعر

سرّني كثيرا مرورك

كثيرون يعلمون عني اني أتأثر بالأحداث من حولي وأحاول أن يكون لي تأثير فيها

وخذي مثال :
قبل 15 سنة دعيت إلى مدرسة بنات لإستضافتي في حوار تديره الطالبات المتميزات

جلست وأمامي على الطاولة ( مسجّل ) لتوثيق الحوار

وبدأت الأسئلة وأنا أجاوب المهم وصلنا لبنت في خدها شامة ( حبة خال ) وحباها الله من الحسن ماحباها

قالت : الشذرات اللي تنزلها في عمودك ( يقول الشاعر ) بجريدة الخليج الإماراتية وايد حلوه
قلت : شكرا ذوقج احلى
قالت : إنت ترتجل الشعر؟
قلت : أحيان بيتين أربعة لكني مب شاعر رزفة ولا عيّالة ولا أصلح لأن أكون كذلك وشعراء الرزفة هم أفضل مني في عملية الإرتجال
قالت : زين إذا إنت شاعر عود شرات ما يقولون قولنا بيتين ألحين ألحين ارتجلهن
قلت : الحين؟ بعني إذا ما قلت بيتين أنا مب شاعر عود شوفي نحن بنكمل الحوار مع زميلاتج وإذا ين البيتين كان بها والا مب شرط علي وانا خبرتج أنا مب شاعر رزفة ولا عيالة

أثناء إجابتي على أسئلة زميلاتها ( كنت أفكر في باص الحجاج اللي صادفته في طريجي وانا ياي المدرسة )
يمكن مضن ثلاث دقايق أو أقل وقلت للبنت ( أم الشامة ) قومي

قالت : ليش
قلت : عشان تسمعين البيتين

قلت

غطي على الشامة واعْطف على وَفـْد
حجاج بيت اللهْ وباقِي الْمِسِلْمين

لا يحسبوها بالخطا الكعبه عن بُعْد
ويحوّلوا القبله عليهَا الْمِصَلين !!

البنت سمعت البيتين وطلعت من القاعة

وفيما بعد اعتذرنا منها وكملنا القصيدة


الشامة

غطي على الشامة واعْطف على وَفـْد
حجاج بيت اللهْ وباقِي الْمِسِلْمين

لا يحسبوها بالخطا الكعبه عن بُعْد
ويحوّلوا القبله عليهَا الْمِصَلين !!

قلّي عمىَ .. وْ غمّضت عيني أنا عمد
قلّي عسَى .. وْ فتّحْت لا يقول آمين

بعض الهزل يا صاحبي ينقلب جد
والموت ما هو بس ّ طعنه بسكّن

لا تشوفني مركز عصاتي على العند
ولاَ تْغرّك الوقفه ولا جحظة العين

ميّت وانا واقف ولا داري ٍ حد
ولو حرّك النمل العصا طحت ذا الحين

قلّي عجبني قولك إش لي معك بعد
قلت السؤال اللي محيرني يا زين

فيه اربعين إمن الشبه لك وانا فرد
وش حالتي لو شفت تسعه وْ ثلاثين

يلّي بلا شوك انبتت وجنتك ورد
ويلّي العنب في شفّتك له مكانين

حبّبت كل الناس في العنب والورد
وكسّدتّ ع التجار ثمر البساتين

لولا الملام أنشيت بيت ٍ من الوجد
يطوف به كل عام كل المحبين

قِلْ ماتروم ..وْ لك علي ينبني وعد
وْتراه وعد الحرّ عند العرب دين

روّح وهو يضحك وانا أنطر الرد
ويوم إنّيَ اسْتأذنت ما قال لي انزين

تصدّقون إنّي على وقفتي بعد
كمّلت أنا باليوم هاذا جمعتين !!

المهزاع


وهكذا 99% من قصائدي تلامس الواقع وتدخل فيه صناعتي الشعرية واسلوبي