[أبو مسلم الصلتي]

أمرن حــتم خيرن وشرن منحــتم
لأن الحــتم مايرتجـع عن محـتمه

سيره رتـــــم دايم على ذاك الرتم
لأن الرتم يصـعب تغـيـّر له ارتمه

تركه الشـتم لاتستمع له من شـتم
لأن الشـتم يرجع على من يشتمه

عود العـــتم ينفع ترى وقت العتم
لأن العـــتم يهدي فطــريقٍ معتمه

حذروا الغــتم لامن تغضب اوغـتم
لأن الغـــتم عذره معه في المغتمه

شوفوا القـــتم لو يرتفع بعده قـتم
لأن القــتم ماينمسك في المقـــتمه

سرّك كتــــم لامـــن طلع ماينكــتم
لأن الكـــتم أمن وســلم من يكتمه

ثوبن هتم داري على أمره وهــتم
لأن الهـــتم يمشي فزيادة مهــتمه

قلنا يتـــم وانتوا معي قولوا يتـــم
لأن اليتـــم فيه الفــــراق ومأتــمه

هذا الخــتم شروى تفاسير الخـــتم
حظـّـه الذي يتــــلو كتـابه ويختمه