"
"
"
"
جيت شاعر شاف حلمه ينكسر قدام عينه
ـــــــــــــــــــــــــــــــــــــــــــــــ بعـد مـا كــان يتـناثـر عـطر كن الله جـابـه
جيت شاعر ماتعلّم يجرح أي شخص أويهينه
ــــــــــــــــــــــــــــــــــــــــــــــ ينتشي بالحرف لين الحرف أبدى إنسحابه
جيت يا أم المشاعر غايبٍ هدّه حنينه
ــــــــــــــــــــــــــــــــــــــــــــــ جيت يا إجلال نزفي جرح أوقظني مصابه
أعتذر لك عن غيابي وأدري أنك تجهلينه
ـــــــــــــــــــــــــــــــــــــــــــــ بس أبا اتنفس هواك اللي كبر فيني عتابه
وأرجع أسأل كيف يعني ؟ شاعرك ما تذكرينه ؟
ــــــــــــــــــــــــــــــــــــــــــــــ كان ينسج من حديث النور للظلما ثيابـه
كنت ما أسأل وانا بيديك عن أي شي وينه
ـــــــــــــــــــــــــــــــــــــــــــــــ كنت أشوف اللي بعيدٍ عنّك أولابه ترابه
كلما دقيت باب/ ألقاك منظومة رزينه
ــــــــــــــــــــــــــــــــــــــــــــــ وكلما عضيت ناب/ ألقاك للبسمة سحابه
وكلما قصرت من حبلي أشوفك تسحبينه
ــــــــــــــــــــــــــــــــــــــــــــ وكلما حاولت أتخاذل تكوني لي ذرابــه
وكلما ناديت ربعي كن تغشاهم سكينه
ــــــــــــــــــــــــــــــــــــــــــــ وكلما خيّمت في حزني/ غدوا يمّي عصابه
باختصار إني معاك إنسان أرقى من سنينه
ـــــــــــــــــــــــــــــــــــــــــــ بس في أسبــاب خلتـه يتمادى فـي غيـابــه
أولاً : تمثالي المنحوت ماطاحت يدينه
ـــــــــــــــــــــــــــــــــــــــــــ شامخٍ مثل النخيل لو جراد القيض صابه
ثانياً : إني بغيت أرتاح من صخب المدينه
ـــــــــــــــــــــــــــــــــــــــــ وافترش حلم الحواير ليل ذابل في اغترابه
ثالثاَ : صدري تهشّم ضاق باصغر ساكنينه
ــــــــــــــــــــــــــــــــــــــــــ من متى ؟ مدري يجوز الحبر سبّب إكتآبه
رابعاً : هالنزف يشهق بؤس والذكرى تهينه
ـــــــــــــــــــــــــــــــــــــــــ ترجمة إحساسـه المخنــوق أشياء اتّشــابه
خامساً : لا صارت أشيائي من غيابي حزينه
ــــــــــــــــــــــــــــــــــــــ لازم املأ هالفراغ بقلب واحساس وقرابه
سادساً : عشرين عام آكيل من نفس العجينه
ـــــــــــــــــــــــــــــــــــــــ أفتخـر في خبزي الأسمـر وتخذلني ذبابه
سابعاً : طيّـرت أحـلامي أمـام الكــل زينه
ـــــــــــــــــــــــــــــــــــــــ للأسف بعض العقول تقول أسرابك كآآآبه
ثامناً : تاهت مع الضوضاء أشيائي الثمينه
ـــــــــــــــــــــــــــــــــــــــــــ صار نعق البوم أرقى من دواوين الكتابه
تاسعاً : لا صار أكثر من قيادي للسفينه
ــــــــــــــــــــــــــــــــــــــــــ ما عليها الّا الســلام ولا توالـيها نجــــابه
عاشراً : ( واستغفرالله ) لا تسموها ضغينه
ـــــــــــــــــــــــــــــــــــــــ ماتت الهيبه ورموز الشعر ماعادوا مهابه
أبوعوف - يناير 2011 م