[سليمان الرواحي]

مساجلة رزحه بين سليمان الرواحي و يعقوب الحضرمي
يعقوب
ياطير حلق صفق جنحانك وروح .
واصل مسيرك في أرض العزيزه وحط .
أزقر على شخصا عنده الكرامه تفوح .
نهره يطامي جاري من منابع شط .
سليمان
حيا بعفادن متعلي ف عالي السطوح
قالي تفضل عندي من جداهم خط
أولاد حضرم لي معهم ترد الروح
أشهد تقايه لن دار الزمان و شط
يعقوب
أنت دليلي أكثر من شمس الوضوح .
من دونكم هيهات قلبي ينبسط .
زمني بلاني تايه في جبال وسيوح .
متلومني في حب الغواني مرتبط .
سليمان
راعي المعزه دائما حالك نصوح
ومن هالنصيحة لا ملامات و غلط
عندك ف دارك ثوبن هذربي ومملوح
وعنده دواك بلا كتابات و قرط
يعقوب
يرجع شبابك من نظرت غزال الدوح .
يرعى الخزامه وفي بر الفيافي ينط .
عطر الورد من وجنته شمه وتوح .
ناسف جدايل دون مالمسه مشط .
سليمان
يا روح حني وبكيه الغضي بالنوح
قالوا الدخاتر جسمي يشتكي م الضغط
هايت كني ممدود الثرى مطروح
موسد يميني ما بيه علايل قط
يعقوب
ريقه عذب بلسم ويشفيها الجروح .
تغنيك عن جرعة علاج المنتشط .
مثل الحواري قلبي يحنله ينوح .
أبغي المثيبه عندي لي يريده ويشترط .
سليمان
توكل على الله ما دام الدرب مفتوح
ولد المهايا يبغى له قناصة صط
كتم فوادك لا تبوح الهوى لا تبوح
عن مبغضينه ينوا له حروز و ربط

@@@@@@@@@@@@@@@@@@@@@@@

تحياتي للجميع عموما و للمعلم ابو مسلم