السلام عليكم ورحمة الله وبركاته اسعد الله مساءكم اخواني الاعزاء
اليكم هذه المحاوره في فن الرزحه
بيني وبين الشاعر القدير ناصر بن سليم الناعبي
وذلك في محفل عرس في ولاية الكامل والوافي ( الوافي )
يوم الجمعه وقت العصر بتاريخ 21/4/2017
ناصر الناعبي
صلّوا على من قسّم جملة الاديان *** وفرض على الامّه فروضا واجبه
انثر سلامي عليكم شايب وشبّان ****** اهل الفضايل واللزوم الواجبه
عبدالله الراسبي
ساس النّبوه ادعى للهدايه شان ******* صلّيت به عد الرّياح السّايبه
حيّا بسلامن من فارس بني شيبان *** بوصولكم كلها الخواطر طايبه
ناصر الناعبي
ساعة وصلنا الدّيره في طيبه وامان **** نمشي بسراعه والبعيد انْقرّبه
اهلا سهلا بشيفة ملتقى الفرسان **** يحيوا صياصيها ويعزّوا الموهبه
عبدالله الراسبي
نفرح بشوفه الخاطر صايغ العيصان ****** وياللي نصانا في بلدنا انويّبه
حسبة مكاسر ف الفلك سبع وثمان ** وراعي الفلك نعرف حجيله ونحسبه
ناصر الناعبي
ذي ديرتن مغروسه ورد وزعفران ***** المسك غالي والتاجر م يقرّبه
يا طير غرّد مثل طير الحرقفان ******** ما بين عيدان وظليلن رايبه
عبدالله الراسبي
اما العسم يمحنّي ويعجبني اليمان *** وشي م الحكي يصعب علينا انعرّبه
حصن الغليله عدنا امقفّله البيبان ******* واللي يقرّب في حدوده يصوّبه
ناصر الناعبي
انته عقيد السّيره قايد وربان ******* وكل واحدا يمشي بسنيار اخْشبه
نبغى مثلنا الليله بقسمة الميزان ***** وكل واحدن ياخذ بديده ومطلبه
عبدالله الراسبي
ما بك قصيره وافي مقدم الشّجعان ****** نظم القوافي في الحساب مرتبه
اوزن واعاير واحسب مكيال الوزان ** من عادتي اوفي الوزن ما اشط به
وتمت المحاوره