نبي نضحك ولكن
العتم في دربنا واقف وساكن
ونستخلص فراوة فقر متمسكن
نبي نخلع قديم القطن
كفانا لونها الداكن
نبي نضحك ولكن..
ما يوسدك العتم الا لحاجة
وأنت تتحرى المتاع
بين ترتيب الوجوه
وبين فوضى أنفعالك
ترقص بصدر الضياع
يالعتيم اللي على عنق الزجاجة
من أذنك الارتفاع
من طلبك الموت لابد ويموت
وأنت جيت ولا تموت
وأنت قبح
وأنت ذل
وأنت لعنة
وأنت اسوا من تخيل ان هذا الفقر معناه السكوت
يالعتيم اللي تشبع من عرانا
ما جنيت الا الوجع والستر واجب
أنت مفتاح المصايب
والجحود اللي تغطأبك سواد
صار لك هالحزن شايب
وصارت الدنيا رماد
يا كثر هذا الرماد اللي تعفن بين أطراف الاصابع
تحترق كل الاصابع يالزمان
تحترق كل الفصول ولا تبان
وأنا في فوضى مكاني
ملني الشارع ومات
كان لي قنديل اوشك للممات
مات قنديلي
خلص زيت الحياة
شفت يا فوضى المكان
شفت هذا اللي رجم بابك وراح
ما ترك الا عيون
وعيت تشوف الصباح
يلعن الطين الجبان
يلعن الطين الجبان
يلعن الطين الجبان
اللي سكن عشرين عام بكوم ريش
وما قدر في يوم يهديله جناح
بس نضحك دون لكن