أعزائي القراء والمتابعين لما يقدم في هذا لقسم
هذه محاورة في الرزحة بيني وبين الشاعر سعيد بن راشد السوطي
عامر
سمّيت بسم الله رب العالمين // موجود وماتشوفه العيون الشايفه
صلّوا على نبيّكم يا الرّامسين // يشفع لكم يوم الخلايق واقفه
سعيد
على النبي صلّينا خير المرسلين // لي مخوننّه بولهب بالزّايفه
بين الصّفا والمروة كلهم حاضرين // وقفت يدينه بولهب متكسّفه
عامر
انثر سلامي على جميع المطربين // اهل المعزّة والسيوف المرهفه
من طيب خاطر مـ البعد متعنّيين // يلهم سوابق من عصورٍ سالفه
سعيد
نتبادل الزيارة فـ عيد المسلمين // وعلى لقاهم روحنا متشفّفه
عسى من الله دومنا متآلفين // في حالها تبقى حصينه الطايفه
عامر
صرح المعزّة شامخ ابداً مايلين // ثابت وماتهزّه الرياح العاصفه
اهل الحسد والجور صبحوا خاسرين // اشهد فرحنا والخلايق خايفه
سعيد
راعي القلم زايد فـ وسط الفاهمين // ماظنّتي الدارس يغيّب مصحفه
لوٍّ صعد وتعلّى أمّي ياضنين // وماظنتي يحضى ابكراسي مصفّفه
عامر
حد مـ اللوادم في الجهاله عايشين // ماشي فهامه عندهم او معرفه
لي ماتعلّم في كتاب الدارسين // يبقى يتلخبط والسّطر مايعرفه
سعيد
آزر وقومه عـ المعزّة رايغين // ضلّوا افـ عبادة عـ الطريق مزحّفه
قال النبي ردوا علينا مسالمين // قولٍ فصيح ِ والسامع يشرّفه
عامر
مافادهم امره وكلام الناصحين // وزهفع رماهم في الدروب التالفه
كثر الأسف مافاد وصبحوا نادمين // كل واحدِ باقي يقاسي حسايفه
سعيد
ماذا نقد خبّاب من قولٍ حسين // قرّب عصيّه والحبال مرضّفه
حيّات كانن واصبحن ظرسٍ سنين // وبقي ف مهانه من بلاهن وأسَفَه
عامر
سبحان من انطق لسان الجاهلين // من كان اول في النطق متكلّفه
والختم صلوا ع النبي يا سامعين // محمد المبعوث يوم الراجفه