السلام عليكم ورحمة الله وبركاتة
قصيدة لـ الشاعر/ يوسف الخليفة ( أبو عبد الله )
خاويت انا الوحده وخاواني الليل
نديمي اللولاح بالبيد خالي
لو الفتى يطلب مدا الطاف ما نيل
مير اوزب المجهول عندي موالي
وانا مسيم بحالتي دون تعجيل
وازريبه اقفى والحقته الثعالي
ما بالحسايف تستنير القناديل
والنار ما تطفى بشوس الرجالي
لقيت بالوحده جميل التعاليل
ولا عافت حسوسي زحول العيالي
لكن عسى الخيره بدار الحلاحيل
اللي تنازوا طالبين المعالي
ما برّق الجاهل على ويش له ذيل
ما يبصر خلافه يشوف الختالي
لقيت بالوحده رسوم المداهيل
واخذت منها نايلات الطوالي
لا شك انا عمّقت قاف التحاليل
ودليت اطورق من شراشيف بالي
عشرين يومن طاولتني مباحيل
لعلها تنجال من دون تالي
رجواي باللي مجري سيحون والنيل
كافل على الصمدا خيوط النمالي
بغيت احورف دون ذاتي بتمهيل
مير استوا الظاهر بروس العوالي
منهو تذوق جماه روس القصاميل
ويقول ماكولي على الذوق حالي
هذاك دربوسن يلف الخلاخيل
ما تستقيم خطاه فوق الرمالي
الليل سرمد والهمايس مقاليل
الا يا كود البوم دلا يلالي
ادنيت الارطا يابساتن حطاميل
وخليت ناري بالصحاري علالي
ودقيت من بن الهراري مع الهيل
والدلة الصفرا بها الكيف صالي
باقصى الخلا عن زايد القال والقيل
والا الفرج عند الولي ما استحالي
يالله راجينك عساها تساهيل
منهو يلوذ بجانبك ما يبالي