ياكثر الأفكار تسبح في فضا بالي
ــــــــــــــــــــ ,,, تزهمني حروفها من قبل لأزهمها
لاجرهد الليل دك الصدر همالي
ــــــــــــــــــــ ,,, سيله يفج الحنايا لين يوسمها
عزي لحالي ليا من صرت بلحالي
ــــــــــــــــــــ ,,, ونوافذ الصبح ابدت لي تجهمها
ياليل ياكم فقدنا واحد غالي
ــــــــــــــــــــ ,,, كانت هنا جرته والوقت دمدمها
تعبت من كثر ماطيفه يورالي
ــــــــــــــــــــ ,,, واشعر بفقده وعبرة وجده اكتمها
ياكم تغنيت لعيونه وغنالي
ــــــــــــــــــــ ,,, ذكراه للحين ما بادت معالمها
لاطرّف الليل واقبل فجري التالي
ــــــــــــــــــــ ,,, جتني عسوسه ملففة عمايمها
كني بها لادنت مني وانا سالي
ــــــــــــــــــــ ,,, تنشد عن الحال وتجدد مأتمها
لويكسي الحزن صدري ثوبه البالي
ــــــــــــــــــــ ,,, انا دموعي قبل شوفه مولمها
رياح الأيام تنحت شامخ جبالي
ــــــــــــــــــــ ,,, وانا بعون الولي والصبر أقاومها
لوكل شي تمنيته تهيالي
ــــــــــــــــــــ ,,, ماكان نفسي هبوب الياس حطمها
والساقي اللي يمر بسدرة آمالي
ــــــــــــــــــــ ,,, لوشح في ماه مالانت عزايمها
ولو ينبت الحقد بين وجيه عذالي
ــــــــــــــــــــ ,,, ماشفتني عندها وبروحي اخدمها
اكون عالي ولكن غير متعالي
ــــــــــــــــــــ ,,, وان شفت ذرة كبر في نفسي اخزمها
العذر طبع الكريم وحكمة الوالي
ــــــــــــــــــــ ,,, تخون الأعذار هقوة من يقدمها
ياكثر الأسماء في بالي وجوالي
ــــــــــــــــــــ ,,, لكن ماهو كلها دايم اكـــلمها
الا الذي في خفوقي منزله عالي
ــــــــــــــــــــ ,,, لا والله إلا ثـــوانيه اتغانمها
لاضاق صدر الحياة وشانت احوالي
ــــــــــــــــــــ ,,, نبرات صوته جيوش الحزن تهزمها