[محمد المخيني (ود صديق)]

مساجلة رزحه بين محمد ود صديق وطلال العريمي
محمد : ١
بنثر سلام الله بلا بغض وعتاب
وتالي تحيه مسطره في دفتري
ياساكن الشريه لشوفك فوادي طاب
شروا ليأكل حلوى وفيه السكري
قال طلال : ٢
ابدي سلامي صاحبي قبل الخطاب
وارد التحيه من ضميري وخاطري
بقدومكم تزهى المداين والهضاب
وحتي الغصن يبدأ يتمايل فشجري
قال محمد :٣
ياولد عبدالله ياخيرة الاصحاب
انت المعلم في القوافي وعبقري
حالك معزه في العلا فوق السحاب
متلامس التربه ولاتلوف صخري
قال طلال :٤
الصاحب انته بك نعليها الرقاب
ونظمك رزين بخط واضح ينقري
شاعر وشاطر في موازين الحساب
في كل محفل ياصديقي تنطري
قال محمد : ٥
كل المعاني صوبكم شدت ركاب
طرفة من عيونك بدنيا تنشري
نحنا نوينا نقلب اوراق الكتاب
ونشوف راعي الصدق ونوبه المفتري
قال طلال : ٦
المفتري له فالدنا حصة عقاب
ونار الحشر تلبج فجسمه وتصهري
وراعي الصدق حسنات ربي له سكاب
تسكب في ميزان الحسين الخيري
قال محمد : ٧
غمض عيونك عن ملاحظة الحجاب
وسدد أذونك عن سماع البنجري
ولاترابع الخاين والظالم الكذاب
كل ما يجرب اسرع انته في الجري
قال طلال : ٨
دنيا مليه بالمشاكل والصعاب
وربي امرنا بالعقل نتفكري
كله شي مفصل في كتابه يالشباب
من حبه ربه فالفقه يصبح ثري
قال محمد :٩
ناوي على الشومه وباغلج الابواب
ودمعي على الوجنه بدا يتحدري
ثرها مصيبه والله يجبر هالمصاب
ودعتك الله يالمسك والعنبري
قال طلال : ١٠
في وداع الله خالقي التواب
يحفظ طريقك صاحبي وينوري
هذه الدنا تحكم علينا بالغياب
واما اللقاء في حكم ربي مقدري