[سليمان الرواحي]

مساجلة بين سليمان الرواحي و صالح الرحبي :

سليمان

ياكارفور الخائن بأسبابك غويت
في شف أريام السفوح العابره
ياما منعت الخاطر والنظر غضيت
لكنها الدنيا رديه و ماكره

صالح

و أنا مثيلك في اللولو ربي عصيت
وكل السبب ريم نحيفه الخاصره
دمعي ذرف ياصاحبي نحت و بكيت
من ريتها عني بعيده مغادره

سليمان

مجتار بالله منهن رفاع الصيت
كل واحده تمشي بهدا متبختره
طحت بعطيله من شراها ما رئيت
قالت تفضّـل ياكريم السّـيره

صالح

خدن شعى نور الدجى و منه عشيت
بدر ظهر بين النجوم الزاهره
و روحي مجرب في بحر الهوى مريت
و رجعت بكفوفن خليه و خاسره

سليمان

قالت ليه تفضل ملفاك و نصيت
قلت العفو خيفان يوم الآخره
قالت توكل قلت عنك ما سليت
قالت في لحظه لن بغيت مباشره

صالح

دعجى الهدايب معها خذت و عطيت
تكرم و لكنها الكرامه قاصره
و يا سعد حظك يوم عنها صديت
سدن و لا كل الأوادم تعبره

سليمان

لن زارني طيفه في الحلم فزيت
أشرب رضابه و في شرابه مسكره
حتى ف صلاتي كم أعيد وكم سهيت
أستغفر الله ما بيدي مقدره

صالح

في شف خلن بدروب العذاب رضيت
هيش حيلتي ما رضى فؤادي يودره
م اوفي وصوفه و حسنه لو صغت و حكيت
كلت لساني من كثر ما أذكره

سليمان

من مكرهن تجرع فؤادي و ارتويت
و كم عاقلا منهن زمانه دهدره
أختم مثالي عد ما قلت و نشيت
سلامي الى الرحبي نسول الخيره