منتديات السلطنة الأدبية

منتديات السلطنة الأدبية (http://www.alsultanah.com/vb/index.php)
-   مدونة الأعضاء (http://www.alsultanah.com/vb/forumdisplay.php?f=20)
-   -   رمااااااآح~ (http://www.alsultanah.com/vb/showthread.php?t=16197)

سعيد محمد البلوشي 06-03-2013 09:55 AM

رمااااااآح~
 
-دُور الأيتام-



خَلّـك معـي لا تسمـعِ لْ قــول واشيــن
عمْر التجافـي مـا بنى قصور الاحـلام

و ان كــان قَصـدك تِشْتعـل بي نِيَاريــن
خِلّــك تــرا مَــيْـــهُـود كَــفّـتـه أسْــقـام


خفّف جِفَــاك و داوي الوصــل باللّيـــن
و اذكر وليفك كان بكْ طيب و اســـلام

منْ غاب طيفكْ عشْت عيشة مساجين
أرْقــبْ نهــار ب ليــل أقضيــه أعـــوام


جافَتْنـي النـاس و كفـى شوفــك العين
وتْبَعْـتـهم مــا عــاد تَحْمِلْنــي عظـــــام

مـــا همّنــي لــو زادَتِـبْـهــم مـلايـيــــن
حـاشــا وكــلّا مــنْ هِـجـرْتـه فَـلَا قــام


بعـدك قِـصَدت بدمـع عيـنـي دواويـــن
زادت شــكوكــي بيـن همّــي والهيــام

و انْت بغيابك لاهِـيِــ)ن(مدري ل ويـن
ليتـكْ تجينـي تنـتشلنـي مــ الحـطــــام


خـوفي بعـادي علّمـك درس قاسـيـــن
و اكبــر همومـي غرّتـك دنيـا الاوهــام

و انْ كــان حبّـك دون قلبــي محبّيــن
أكْـرَمْ علَــيْ موتــي ولا جُـور الايّـــام


واليــوم مــالي مرتجــي غيـر كفّيــن
ترفع دعـاي بسجدتـي لحظـة صيــام

ويشوف خلّـه من بَـعَـدْ غيبـة سنيــن
منسـي طـرِيح و تشْفقَـه دُور الايتام


سعيد محمد البلوشي 06-03-2013 10:04 AM

وقت الرجوع

كمْ واحدٍ قبلك جفى و غاب و رحَل
مــا همّنـي أسأل متــى وقـت الرجــوع


باللّهِ يــا مــن رمش عينــك لــي مَحَـل
إرجــع تـرا بَعـدك طغــى بالقلـبِ لــوع


كـلّ المـصـايب فــي غيابـك بـــي تِـدل
و الهــمّ علّقنــي رَهِـن دنيـــا الخضــوع


ليتــك تجــي هــذا اللّـي فيني مو سَهِل
لا مو سَهِـل قلبٍ يعيشِ بــلا ضلـوع


هـذي سـواتــك كيـــف تبغـــى يحتمــل
مــن بــاع ناسه لَجْل ِ تحيــا بالربـوع


ذكّـرتـنــي يومــي صغيــر و هَـمْ طفِل
عاجـز تباكى مــن كثِــرْ عَضّ الصبوع


كــلّ الـــذي حولـــه تــداركـــه الملــل
والـلّــي بغـاهــم مــا لقــى فيهم تبـوع


ودّه يــنـاظــر بــسّ خــانـتْــهِ الـعِـلَــل
يـا كيـف يقدر من ملَت عينه الدموع


حـيّـرتنـي و احـتَـرْت حـارت بــي دُوَل
و ارخصتني ما عاد لي قيمه و سطوع


عـجّل بلطْفك و انسى ما فات و ذِبَـل
من قبْل ماتطغى على النفْسِ الجموع

سعيد محمد البلوشي 06-03-2013 10:11 AM


أرجـــوك لا تبكــــي





دنيـــا -بليّــا لْقـاه- مـا تنْصفِ اثْنيـن
مابيهـا حتّــى و ان وَهبنــي حياتــــه

كم واحدٍ قبلي -وأنا أقُول مسكيــن-
مــا حَــبّ خلّــه كثْـر حبّــه لِذَاتــــــه



ما هي قضيّة حبّ هُو زين أو شيـــن
وْلا هِــي أمانــي نرْتجيهــا شراتــــــه

كم قلْب حَبّ وْ رد قسى خان بعْدين
هذي مِزايـــا الـحُب وهـذي جزاتــــه



أرجــــوك لا تبكــي ترا بيننــا البيــن
و ان طال ما تَقْصر علينـــا سواتـــه

ما تسْوى دمعاتك تجرّح بَها العيــــن
ما دام هجْــرك يوم تَهْدي وفاتــــــه



كفّي ولا تَبكين يـــا عيــن تِكْفَيــــن
صدّي عليـه ودْموع ذكــراي جاتـــه

و ان مِرّ لي طاري ويسأل أنـا وين
ما بين رِمْش وْ عين أداري وصاتـه




سعيد محمد البلوشي 06-03-2013 10:15 AM

ليـــــه الغـرور؟!



بكتب قصيدي علّ تسعفني السطور
و اكثر عتابي جوركــم يا اهل الزمـن


الصدر ضايــق والمشــاعر بي تفُـور
وش حيلتي شفت المصايب و ارْتوَن


ليــه التكبّـر.. و التفــاخر.. و النفـور
نتـرك حضارتنـا وْ عراقتنــا لِ مَــن؟!


ليه التبــاهي صرنـا مــا نلقـى سرور
مـن ويـن مـا نـمشــي تقابلنـا الفِتَـن


حتّى الشوارع صــارت أشبه بالقبور
أبطالهـا مــوت وْ اصـابـات وْ كِفَـــن


هـذا يسابق قال تثْني بـي الحضــور
مــا تدري انّ الموت أسْبـق للبــدَن.!!


وش ذنبه اللـي ماسـكٍ خـطّ العبـور
تهْديهِ مـن ظلـمك اعاقـات وْ حِـقَـن


وش ذنْـب طفْـلٍ تـوّه بْعمْر الـزهور
كم من بيــوت بْطيشكـم اتْيتّــمـــن


يا نـاس كِفّوا واللـه دْموعــي تثــور
لا شفْت رَبْعـي صـار يبكيهـم وطَـن


واللي توهّـم مـن حـلا ذيك الخصور
يَكْسر خِطـاه وْ يسْتفـزّ اللـي رِكَــن


ينشر تقاسيمـه علــى مَـرّ الدهــور
يا كثْرِ ما يخْفــى ورا خضْــر الدّمَـن


وش قدّرك مسكين تَحْمل هالفجور
رجّح ضميرك لِ الورى تصْبح فَطِـن


يا صاحبي ما هكذا تُجزى النحــــور
ليتك تخاف اللي رسَم فيك الحسِن


بُكْرَه جمالك ينْعدم ليــــه الغرور؟!
أصْلك و فصلك طينِ ما يسْوى ثمَن





سعيد محمد البلوشي 06-03-2013 10:22 AM

ليْلة لِقَايا





مجسّم حَلا مَمزوج ألوان و زوايا
ـــــــــــــــــــــــــــــــــ و ماسات لمّاعه تضوّي خدّ ناري


و زَحمة برَاكين و تنَاوير و شظَايا
ـــــــــــــــــــــــــــــــــ تجلّت..لآجل تعلن بداية اندثاري


و غَاراتَها تَنطق غَلا بين الحنايا
ـــــــــــــــــــــــــــــــــ تداعب وَتَر سمعي تعجّل ب انهياري


تسيطر علَى كلّي وانا كلّي بقايا
ـــــــــــــــــــــــــــــــــ جُزَيئات منثوره ورا غيْم و صَحَاري


و رشفات من بَسمه تساقيني سِقَايا
ـــــــــــــــــــــــــــــــــ تجدّد وَهَج قلبي تلَمْلمْ لي آثاري


ترجّح حَكَاويها وانا أَهْدي روايا
ـــــــــــــــــــــــــــــــــ تكتّب..و تشطبني و أَعلن انبهاري


تَرَاكم مَشاعر..كَمْ تناسَتْها الشِفايا
ـــــــــــــــــــــــــــــــــ و ثارتْ لِ تَكشفني بلا غير اختياري


مرَايا.. تجسّد سرّهَا ليلةْ لِقَايَا
ـــــــــــــــــــــــــــــــــ و لِليومِ عنّه طيفها والبحْثِ جارِ !!



سعيد محمد البلوشي 06-03-2013 10:25 AM

ايـــــه أحبّــــك





"ايه أحبّك" قالها قلبي وْ رضيـــت
غصْب عنّي أنطق حْروفك وأبيهـــا


صمْت عن لقياك لكن ما قويــــت
ذكرياتك وين ما رحـت ألتقيهــــــا


وأدري أنّك في غيابي مـا سليـــت
دمعتك خانت عيونــك و تْخَفيهــــا


خانتك حتّــى الجفـون و لا دريـــت
رغْم صــدّك شاقها مــن يهتويهــــا


لو تكــابر وش مــن الدنيـا خذيــت
كــــان قبـلــك دام فيـهـــا أوّليـهــــا


و ان جرحتك تدري أنّي مــا عنيـت
كم جروح لغايتــك قمـت أشتكيهــا


مـن ثمــان سنيــن عايش لك و ليت
تنشـرَى هــذي السنين و أشتريهـــا


لجْل تعرف كــم لعينـاك اشتـقيــت
ولا شكيتك من كثرْ مــا همْـت فيها


"ايه أحبّك"..والمصيبة ما اكتفيت
قمت أردّدها وأسلّــي نـفـسـي بيهـا


لو بيـدّي قلـتهـــا فــــي كــلّ بيــت
من بقى بعـــدك يعاتبنــي عليهــا!!



سعيد محمد البلوشي 06-03-2013 02:00 PM

.
.

متّع بفنّك و اطرب الكيف بالكيف
ــــــــــــــــــــــــــــــــ اسمك "ريال"و تستحقّه بْجَداره

لونك بيَاض و فاق كلّ التواصيف
ــــــــــــــــــــــــــــــــ هذي علومك جاتنا بالبشاره

بأرضك سطَرت الفوز من غير تكليف
ــــــــــــــــــــــــــــــــ وبْأرضهم ما ذاقوا إلّا المراره

علّمتهم كيف البطل يكْرم الضيف
ــــــــــــــــــــــــــــــــ يالله عساهم اهتنوا بالخساره

هذي علومك فوق حكْي الملاقيف
ــــــــــــــــــــــــــــــــ "يا هي كبيرة".. جبتها وبْشطاره

.
.

سعيد محمد البلوشي 07-03-2013 03:08 PM

.
.

أحدٍ يخطّ الحرْفِ من غيرِ عنوان
ــــــــــــــــــــــــــــ و أحدٍ حروفه تْجيك مثل التغاريد

و يومي لقيت الحرْف من نَحْت فنّان
ــــــــــــــــــــــــــــ بَروِيه ما أخشى عتاب الأجاويد

.
.

سعيد محمد البلوشي 07-03-2013 03:10 PM

.
.

سنين العمْر لو خطّت من دْموعي عذاب
ـــــــــــــــــــــــــــــــــ أكيد انّ العمرْ فاني وتنساني الجروح

.
.

سعيد محمد البلوشي 07-03-2013 03:12 PM

.
.

سبّح بحَمْد اللّه قَبلْ يمضي الْعمر
ـــــــــــــــــــــــــــــــــ و اذكر فَضِلْ ربّك ترا غيرك ضرير

.
.


الساعة الآن 01:51 AM.

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir

Ads Management Version 3.0.1 by Saeed Al-Atwi

جميع الحقوق محفوظة لدى الكاتب ومنتديات السلطنة الادبية