|
اشهد شهادة انك فارس وصنديد
محاورة في فن الرزحة بين الشاعر: عوض شحاري والشاعر: خليفة الصائغ والشاعر: عامر الناعبي في جروب " شعراء ملتقى الوديان " عوض شحاري: سلام الله عليكم في يومن مجيد حصنى و ذرايه أهل صور الماجدة من أجلكم متعني قاصد من بعيد بنثر تحية من قبل المناشدة خليفه الصايغ: حي بسلامن جاني احساسه فريد وتحمل حروفه من معاني وايده بعاوضه بسلام يفك قفل الحديد وتخضر له الدنيا بمزون وارده عامر الناعبي: اهلا وسهلا ومرحبابك ياعقيد فضّي ابعلومك يانسل الأماجده اشهد شهاده انك فارس وصنديد تسعف ربيعك م المهالك تنجده عوض شحاري: خبرن هناك ايدور به ساعى البريد تعايينا به ما عرفنا انوكده ستوت يقولوا بين الراشدي وسعيد حرب و جحافل و سيوفن مهندة عامر الناعبي : عندك خليفه صاحب الخبر الوكيد صاحب طرب عنده علومن واكده صدره يرحب وانته اطلب ماتريد ضاري يسهلها الامور الكايده خليفه الصايغ: روحي شراتك ما شفت غير الوعيد بس من قدا ود عامر شفت مياحده وحدن قحم بالهندوان ولا يريد م غير المزايح والكرامه عوايده عوض شحاري: شي م الحرايب تنشب من بيت القصيد شرارتن شبّت و طشت ساندة وانتوا سلام اعليكم بأسلوبن جديد شجعان توروها الحروب الباردة خليفه الصايغ: طاحت حرب داعس ولا ادور مزيد وامست رمز مثل الحروب البايده واما حروب القلب في الواقع تجيد ونار السمر خليها احسن خامده عوض شحاري: الراشدي م الوادي ولع ف الجريد شبّت و قال لها طريقك مصعدة والداودي متنرفز وامسوّي وهيد من ضيقته شل الجروب اب عامده عامر الناعبي: لعياذ بالله منه شيطانن مريد يوم شبّها نار السعيرة الموقده مابينهم صارات معاتيب و وعيد في المحكمة واليوم صابح موعده خليفه الصايغ: درب الغشامه احسن اخلّه وحيد واختار دربن ثاني دون مزايده منك السماحه ولد عمي يالعضيد يبقى الخسد يلمع بزين قلايده عوض شحاري: الداودي متسلح بالسنانى وليد عنده محاكي والكلام إيصفّـده اللي م عنده شاهد ما عنه نشيد والمدعي لازم يقرّب شاهده عامر الناعبي: كل من عرف له صاحب مجّده تمجيد يتكل عليه في كل شيّ يسانده راعي الطرب ياصاحب مايبا تأييد ماينتظر راعي البصاره يسنده عوض شحاري: أختم مثالي واصريها الحكمه تفيد وإحنا نبادر للنصيحه الجيدة عتبر كلامي كانك تبغى تستفيد عل و عسى منه تحصل فائدة |
ما شاء الله على شعرائنا، كلامكم حكمة وأنغام ونشيد، لكم كل الشكر والتأييد، عامر وزملائه.
|
السلام عليكم الأخ الشاعر القدير / عامر الناعبي يسرّني جدا التطواف بين خمائل النظم البديع والفن العريق العتيد فبلادنا زاخرة بكل ظريف وأصيل وراقي وجميل من صنوف الأدب وفنونه وشرّفني الإبحار في سفينة شِعرية فولكلوريّة قادها نواخذة كبار في هذا الفن فن النظم على وقع الموروث العماني الشعبي الأصيل فنّ الرزحة التي تنفرد بها بلادنا على حد علمي، تماما كما البرعة الظفارية الشهيرة، فلك ولمحاوريك الكرام أجل تحيّة وأطيب الثناء على جمال النظم، وعلى الإهتمام التام بالموروثات الثقافية العمانية الخالصة وتقبّل تحيّاتي |
يبقى الخسد يلمع بزين قلايد (ه )
محاورة جيدة صح لسان الجميع دمتم بخير |
اخي العزيز والشاعر القدير عامر الناعبي محاوره في غاية الجمال بينك وبين الشعراء الافاضل صح لسانكم مبدعين وما عليكم زود ودمت بكل خير وموده اخي الكريم |
اهلا وسهلا ومرحبابك ياعقيد فضّي ابعلومك يانسل الأماجده اشهد شهاده انك فارس وصنديد تسعف ربيعك م المهالك تنجده الله عليك شاعرنا القدير عـــامر الناعبي ابيات في غاية الجمال والروعه نالت استحساني بشده لك مني اجمل التحايا واعذبها كل الشكر والتقدير للشعراء المتميزين |
ماشاءالله محاوره جميله
من شعراء قمه دمتوا بصحه |
| الساعة الآن 12:28 AM. |
Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir