منتديات السلطنة الأدبية - ياليت من نومه يثور وينتقم

إخوتي وأخواتي أعضاء وضيوف هذا الصرح الأدبي العزيز
هذا مقصب رزحة من موروثات المرحوم الوالد هاشل بن عامر الناعبي
اتمنى ان تحوز على رضاكم

هاشل بن عامرالناعبي

ياديرة المعزّة ضيّعتي اللّزم // حسيبك الله ماحتيتي العاقبه
معزّتك وقفت علينا بـ سفك دم // حدٍّ تجرّح كفّه وحدّ روايبه

أوّل كسيتينا لباسٍ محتشم // ثوبٍ يفرحبّه الصغير وشايبه
واليوم لعتينا بـ سيطان السلِم // وتبعّدينا عـ الوطن ما نقربه

ماتذكري وقوفنا تحت العَلَم // نذبح عدانا بسيوفٍ مشطّبه
شبّان ويهزّوا الصوارم والّلجم // بمشوّكاتٍ وجيوشٍ مدرّبه

كنّك نسيتي ذيك الشدّه والخصم // يومٍ تحدّينا الخصيم ونِحْربه
ماتردّنا البنادق لوتمطر ديَم // نشبه سراحين الفلا المتواثبه

ماتعرفي الأنصاف ولاعندك حكم // تفرّقي الشمل وتقولي صايبه
لوكان قصّرنا فـ جنابك بالشتم // هذي عقوبتنا صحيحه مناسبه

لكن بذلنا الروح واتلفنا النسم // صنّا الحمى وصبحت عداناهاربه
هيشن تريدي اكثر من هذا الكرم؟ // صيتك وصل شرق البلاد ومغربه

عيدي النظر في الجيرة وازتادي حِلِم // لاتذيري سكانك وانتي غاضبه
لوكان مسؤلك بصير ومحتزم // يمسك زمامك ويمكّن مخالبه

مشهور صيته مثل نارٍ في عَلَم // بين القبايل ماتردّ مطالبه
إلاّ الحماسه مايله فيها سهم // يترك بديده للخصيم ويوهبه

أوّل يصول ويشبه ضرغام الأجم // شاف الفريسه وثنّى ونفسه راغبه
ماجرّب انيابه فـ عظم ٍ وإنصلم // ولامد أظفاره فـ أديم وشطّبه

كيفٍ يخافه الخصم وخالي مـ الهمم // وتعدّدت بين السطور رسايبه
وتكاثرت أعداءه ونفّثت بالسّم // سكون بلاده وجيرانه واقاربه

ياليت من نومه يثور وينتقم // من كل من ينوي العداوه ويغلبه
عسى نجومه تشرق بالضياء واتّم // ونجوم حسّاده أفول وغاربه